Eldri tíðindir

Línutátturin er nú í kvæðabókini í deildini Tætir og vísur.

Nú ið føstan er komin, dansa vit ikki, og tí verður lítil broyting á heimasíðuni, til vit byrja aftur eftir hálvan oktober. Okkurt verður lagt aftrat kvæðabókini, treyðugt so. Vit eru væl nøgd við dansiveturin og gleða okkum til komandi vetur. Annars fara nøkur og tretivu fólk úr felagnum mánaðarskiftið juni-juli á dansiferð til Stockhoms. Gott summar!

Eysturoyar dansifelag í Tofta skúla. Tvær ferðir eftir nýggjár hava fólk úr felagnum verið í Tofta skúla og hjálpt til við kvøðing, sum í nógv ár hevur verið fastur táttur fyri allan skúlan. Fríggjadagin tann 4.mars hildu tey fastalávint, og eftir at tunnan var sligin, varð dansað í ein tíma, har næmingar sjálvir skipaðu alt. Til seinast taldu Ása og Gwendolyn úr 4. flokki jólini. Umframt fleir fólk frá okkum vóru nógv foreldur komin í skúlan til fastalávintsdansin.

Hugnakvøldið fríggjakvøldið tann 25 februar var gott. 68 fólk. Gott lag og góður dansur. Við borðhaldið hugleiddi Louis Houmann um yrking og yrkingar bæði skemtiliga og álvarsliga. Hann reikaði víð, frá Luther og Melancthon til Janus. So las hann tríggjar egnar yrkingar. Ikki minst tann síðsta, Hundasjúka, hugtók. Asbjørn í Tjørnuvík hevði nøkur góð barnaminnir úr heimbygdini, fortald í hansara skemtingarsama stíli. Nú eru tvey kvøld eftir av hesi dansitíð, og so er føsta.

Eysturoyar Røktar- og ellisheim hevði mikukvøldið tann 9.feb. mentanartiltak. 20 fólk úr okkara dansifelag kvóðu saman við búfólkum og avvarandi. Fólk fingu eina  stutta frágreiðing um, hvussu kvæðini eru varðveitt til okkara dagar. Ein serligan dám settu 30 børn úr Tofta skúla á tiltakið. Tey kvóðu rungandi og vakurt - dugdu væl at skipa. So var sjálvandi drekkamunnur og nógv prát.

Leygarkvøldið tann 5. februar 2011 høvdu vit vitjan av Norðstreymoyar dansifelag. Vit byrjaðu við kl 21.00. Anfinnur Huusgaard legði út við Sniálvstátt, og Heini Holm tók Ormin langa. Síðani gekk dansurin til kl 23, tá vit steðgaðu at okkum at eta. Síðani varð dansað aftur til kl. 2.30. Hetta var eitt gott kvøld við góðum dansi. Norðstreymoyingarnir vóru 22, og vit vóru 42.

Dansifelagið í Runavíkar skúla. Hósdagin tann 3.feb. vóru 10 fólk úr felagnum og hjálptu skúlabørnum í Runavík at kvøða. Vit dansaðu í Løkshøll, og undirtøkan var góð - bæði frá næmingum og lærarum. Vit mundu kvøða í eini trý korter. Eftir kaffi kom Pálin og bað okkum koma í 5. flokk, tí tey duga 10 ørindir av Brestiskvæði. Har sóu vit eisini, hvussu okkara heimasíða verður brúkt í kvæðaundirvísing.

Aðalfundur var tann 21.01.2011, og tríggir nevndarlimir stóðu fyri vali. Kára bar seg undan, so Marita Poulsen av Strondum, sum var eykalimur, er nú vanligur nevndarlimur, og Kára er eykalimur. Sí Nevnd í teiginum til vinstru. 

Dansiferð til Stockholm Sum kunnugt ætlar felagið sær á dansiferð til Stockholm summarið 2011. Vit fara út Føroyum við Norrønu sunnukvøldið 26. juni og vera aftur mikudagin 6. juli. Tað kostar umleið 7000, - kr fyri hvønn. Har er íroknað sigling t/r, bussur við úr Føroyum, gisting í Stockholm og Hirtshals við morgunmati og atgongumerkir til Vasamuseum, við báti í skergarðinum v. meira. Bindandi tekning fyrst í komandi ári ella sum skjótast.

Eitt gerandisdansikvøld av teimum allarbestu. Vit í Eysturoyar dansifelag dansaðu í Glyvr’hans húsi í Norðagøtu fríggjakvøldið 3.desember. Burtursæð frá dansi  til kringvarpsupptøku í februar í ár er hetta fyrstu ferð, at vit dansa aftur í Gøtu, síðani vit fóru úr ítróttarhúsinum í Norðragøtu, har vit dansaðu, frá tí at felagið var sett á stovn í 1969 og til 1994, tá vit byrjaðu at dansa í “Hæddini” í Runavík.

Okkara fólk í Gøtu spentu seg út. Anfinn Huusgaard úr Syðrugøtu legði fyri við “Í Gøtu ein dag”, og gøtukonurnar Anna og Sanna skipaðu Hørpurímu. Tær høvdu eisini bakað okkurt gott afturvið drekkamunninum, sum vit fingu í Jákupsstovu, sum sigst at vera bygd á Tróndargrund. Andras úr Norðragøtu kvað saman við Hans Poulsen ein stóran part av gøtuskeggjum. Og tá Anfinn so fór at kvøða Vaagen, rann mær Tóra gamla í hug - nakað fegin hevði hann verið. Hann dansaði so nógv, sum hann orkaði , meðan hann orkaði, og tað var ein høvuðsorsøk til, at hann var so væl fyri bæði til likams og sálar, líka til hann doyði 91 ára gamal. Bæði Brókatáttur og Sniálvstáttur rungaðu eisini so lystiliga í Glyvra’hans húsi hetta kvøldið.

Spell, at ongi gøtufólk stukku inn á gólvið, men tað kunnu tey gera komandi dansivetur, tá vit vónandi dansa aftur í Glyvra’hans húsi.